Topaz Premyer Liqasında VI turundan: “Kəpəz” – “Qarabağ” - 1:1, “Zirə” – “Qəbələ” - 0:2, AZAL - İnter 1:3
"Qarabağ"ın baş məşqçisi Qurban Qurbanov:
Mənə xoşdur bax bu hal,
Bax bu gedi, bu minval
Çox şükür ki, "Kəpəz"dən
Ala bildik bircə xal.
"Kəpəz"in baş məşqçisi Şahin Diniyev:
Qaçıb işrət dalınca,
Baş qoymadım balınca,
Yüz yol ölüb, dirildim
Mən bir xalı alınca.
“Kəpəz”in qapıçısı Tadas Simaitis:
Gətir bura kitabı,
Yazım bu xoş kəlamı:
Oyuna görə oldu
Bu yarışın hesabı.
"Qəbələ"nin baş məşqçisi Roman Qriqorçuk:
Baş qoşmayıb söhbətə
Dayanmışdıq növbədə
"Zirə"ni məğlub edib
Qərarlaşdıq zirvədə.
"Zirə"nin baş məşqçisi Adil Şükürov:
Əzizim, toy axşamı,
Durun yandırın şamı.
Bu oyunda tanıya
Bilmədim komandamı.
AZAL-ın baş məşqçisi Tərlan Əhmədov :
Əzizim, oyum-oyum,
De, ondan necə doyum?
Allah, özün kömək ol
Bu enişə son qoyum.
"İnter"in baş məşqçisi Zaur Svanadze:
Söz deyim neçə tonluq,
Olsun maraqlı sonluq:
Könlümə düşüb yaman
Bu mövsüm çempionluq.