1/4 final
Polşa - Portuqaliya 1:1 (pen. 4:5), Uels - Belçika 3:1, Almaniya - İtaliya 1:1 (pen.6:5), Fransa - İslandiya 5:2
Portuqaliyanın baş məşqçisi:
Mən aşiqəm bu hala,
Bu gediş, bu minvala.
Biz sürünə-sürünə
Çıxdıq yarımfinala.
Polşanın baş məşqçisi:
Burda bir qala düşdü,
Dağ aşdı, yala düşdü,
Göydən bir bəla gəldi
Bizim mahala düşdü.
Uelsin baş məşqçisi:
Arzuların cəm oldu,
Yığışıb həmdəm oldu.
Bu “qırmızı şeytanlar”
”Əjdaha”ma yem oldu.
Belçikanın baş məşqçisi:
Ətrafımı səs aldı,
Sən səsini kəs, aldı.
”Qırmızı şeytanlar”ın
Canını Uels aldı.
Almaniyanın baş məşqçisi:
Dəyirman boş dolanır,
Üstündə quş dolanır.
Qurban olum Allaha,
Mənimlə xoş dolanır.
İtaliyanın baş məşqçisi:
Mən dolanıb hər yanı,
Qovdum çəni, dumanı
Bəxt bizdən üz döndərdi,
Penaltilər zamanı.
Fransanın baş məşqçisi:
Bax bu dərin quyunun
Bulandırdıq suyunu.
İslandların toyunu
Kimsə gözləməyirdi
Bizdən belə oyunu.
İslandiyanın baş məqçisi:
Bilməm belə nöş oldu,
Ümidlərim puç oldu.
Qapımıza vurulan
Qolun sayı beş oldu.