DÜNYA FUTBOLU

İngiltərənin “Çelsi” futbol klubu Çempionlar Liqasının qrup mərhələsinin V turu çərçivəsində səfərdə İtaliya “Yuventus”una 4:0 hesabı ilə qalib gəlib. 
"CEMPİON.AZ" xəbər verir ki, görüş Londondakı “Stemford Bric” stadionunda baş tutub. Vurulan qollar Trevo Çaloba (25-ci dəqiqə), Ris Ceyms (56), Kallum Hudson-Odoi (58), Timo Vernerin (90+5) hesabına yazılıb.
Bu qələbə sayəsində İngiltərə klubu Çempionlar Liqasının 1/8 final mərhələsində vaxtından əvvəl iştirakını təmin edib. “Yuventus” son turda Rusiya “Zenit”ini məğlub edərək (4:2) pley-offa yüksəlib. H qrupunun paralel matçında “Zenit” İsveçin “Malmö” klubu ilə heç-heçə edərək (1:1) Avropa Liqasına vəsiqəni təmin edib. 
Dördlükdə 12 xalla "Çelsi" 1-cidir. 2-ci "Yuventus" (12 xal), 3-cü "Zenit" (4), 4-cü "Malmö" (1) klublarıdır. “Çelsi” növbəti oyununu dekabrın 8-də “Zenit”ə qarşı keçirəcək. “Yuventus” həmin gün “Malmö”nü qəbul edəcək.
E qrupunun qarşılaşmasında İspaniyanın “Barselona”sı “Benfika” ilə heç-heçə oynayaraq (1:1) qrupdan erkən çıxmaq fürsətini əldən verib. Matçın baş hakimi rusiyalı Sergey Karasev olub. Kataloniyalılar üçün bu görüş noyabrın 6-da komandanın keçmiş oyunçusu, dördqat turnir qalibi Xavinin rəhbərliyi altında Çempionlar Liqasında ilk olub. E kvartetində keçirilən beş oyundan sonra lider Almaniya “Bavariya”sı (15), 2-ci “Barselona” (7), 3-cü “Benfika” (5), 4-cü Ukrayna “Dinamo”su (1) qərarlaşıb. Çempionlar Liqasının pley-off mərhələsinə yüksəlmək üçün kataloniyalılar dekabrın 8-də “Bavariya” ilə görüşdə xal toplamalı, “Benfika” isə paralel görüşdə “Dinamo”ya qalib gəlməməlidir.
Fransanın “Lill”inə uduzan (0:1) Avstriya “Zalsburq”u da Çempionlar Liqasının 1/8 finalına çıxmaqda çətinlik çəkib. Komandalar G qrupunda çıxış edir, avstriyalılara pley-offa yüksəlmək üçün qələbə lazım idi. Dördlüyün paralel oyununda “Sevilya” doğma meydanda Almaniya “Volfsburq”una qalib gəlib (2:0). Beş oyundan sonra qrupun lideri 8 xalla "Lill", 2-ci "Zalsburq" (7), 3-cü "Sevilya" (6), 4-cü "Volfsburq"dur (5).
F qrupunda keçirilən görüşdə İsveçrənin “Yanq Boyz”u İtaliyanın “Atalanta”sı ilə heç-heçə edib (3:3).