DÜNYA FUTBOLU

2028-ci il Avropa Çempionatı Böyük Britaniya və İrlandiyada keçiriləcək və birgə ev sahibləri digər iddiaçılarla rəqabət aparmadan turniri qəbul edəcəklər. Bu barədə Britaniya mənbəsi Daily Mail məlumat yayıb.

Türkiyənin 2016 və 2024-cü illərdə iki son Avro təklifində uğursuzluğa düçar olduğu və daha bir məğlubiyyətdən qaçmaq istədiyi üçün namizədliyini geri götürməsi ehtimalı var, Rusiyanın planlaşdırdığı iddia isə ölkənin beynəlxalq idmandan uzaqlaşdırılmasını nəzərə alaraq etibarlı deyil.

Avro-2028-ə ev sahibliyi etməkdə maraqlı olan milli assosiasiyalar bunu 23 mart 2022-ci ilə qədər bəyan etməlidir.

Avropa Futbol Assosiasiyaları İttifaqının (UEFA) 2028-ci ildə keçiriləcək Avropa çempionatında iştirakçıların sayını 24 komandadan 32 komandaya çatdıracağı və turnir üçün ən azı 12 stadion tələb olunacağı gözlənilir.

Fevralın 28-də Beynəlxalq Futbol Federasiyası (FIFA) və UEFA Rusiya millisini, eləcə də bütün Rusiya klublarını bu təşkilatların nəzarətində olan bütün yarışlarda iştirakdan kənarlaşdırmaq qərarına gəlib.

Rusiya Futbol İttifaqı (RFU) FİFA və UEFA-nın Rusiya milli komandalarının beynəlxalq yarışlardan kənarlaşdırılması ilə bağlı qəbul etdiyi qərardan İdman Arbitraj Məhkəməsinə (CAS) müraciət edəcəyini açıqlayıb.