BİZİM FUTBOL

“Qarabağ”ın sabiq kapitanı Qara Qarayev karyerasında önəmli rol oynayan komandada son akkordunu  “Feysbuk” səhifəsindəki paylaşımı ilə vurub. Paylaşımı olduğu kimi təqdim edirik:
“Bu mesajım “Qarabağ” ailəsinədir!
18 il öncə “Qarabağ”ın akademiyasında seçimlərə qatıldığım gün yadımdadır. Həmin gündən sizi həm futbolçu, həm də bir çox oyunlarda kapitan kimi təmsil etmək çox böyük məsuliyyət idi! Mən bu anların hər bir saniyəsini yüksək qiymətləndirirəm və fəxr edirəm. Bu 18 il ərzində çalışdım ki, ləyaqətli şəkildə “Qarabağ”ın adını daim uca tutum və şərəflə xidmət edim.
İndi isə keçmiş və hazırkı komanda yoldaşlarım, məşqçilər, klubumuzun prezidenti, bu müddət ərzində mənimlə birgə çalışmış insanlar və hər zaman mənə sevgi ilə yanaşan, dəstəkləyən, çətin və yaxşı günlərdə yanımızda olan, xoşbəxt və kədərli günləri birlikdə yaşadığımız azarkeşlərə təşəkkür edirəm. Hər zaman mənə öz övladınız, qardaşınız kimi sahibləndiniz...
Futbolda böyüməyi, Azərbaycan idmanı tarixindəki bütün uğurlarımı “Qarabağ”a borcluyam. Bütün azarkeşlərə, eləcə də “İmarət” və “Qarabağ ordu”ya öz sevgimi bildirmək istəyirəm, siz hər zaman ürəyimdəsiniz! Ayrılıq da sevginin bir hissəsidir. Qarabağlı olaraq, “Qarabağ” daim ürəyimdə qalacaq.
Hörmətlə, Qara Qarayev”.
Futbolçu ürək sözlərinə bir neçə foto əlavə edib. Maraqlıdır ki, bütün fotolar klubun inzibati işçiləri ilə çəkilib. Görünür, inzibati işçilər Qaranı çox sevirmiş. Bəs rəhbərlik? Klub rəhbərliyi ilə bir dənə də fotonun olmaması diqqət çəkir, sual doğurur: Qara “Qarabağ”dan niyə getdi?